SONA VƏLİYEVA
 

YOL BAŞLAYIB GEDƏN KARVAN

 

(S.Hacıbəyovun «Karvan» simfonik lövhəsini dinləyərək)

 

Bir budaq kölgəyə möhtac,

Bir bulud yağışa ac

Dərdinəmi gəzir əlac?

Düşübdü çöllü-biyaban,

Yol başlayıb gedən karvan.

 

Bir yolçuluq köhnə mərəz,

Arxadan harayım yetməz,

Getdiyi yol gedər-gəlməz,

Sən nigaran, yol nigaran

Yol başlayıb gedən karvan.

 

Dünya oyun ötür-ötür,

Yükün əyər, yüngül götür,

Sən allah məni də götür,

Yarıyaq bu yoldaşlıqdan,

Yol başlayıb gedən karvan.

 

Bu nə tale, bu nə hikmət,

İtən torpaq, ya da ki, bəxt.

Görəm, görməyəm, ya qismət,

Gətirəsən çarə, dərman,

Yol başlayıb gedən karvan.

 

Ağ dəvənin üstə gözəl,

Gözündən yaş xəzəl-xəzəl.

Ölüm doğulmadan əzəl,

Qəribliyi, dərdi dastan,

Yol başlayıb gedən karvan.

 

 

Səhra uzun, yağış, külək,

Bu mənzilə kəsə gedək,

Yol azdırıb səni fələk,

Qarğıyıb başdan, binadan,

Yol başlayıb gedən karvan.

 

 

Bu zınqırov səfər himni,

Beynimdə ölənə kimi,

Mənim kinim, dəvə kini,

Bəxşişdi haqdan, xudadan,

Yol başlayıb gedən karvan.

 

Vətəndə Vətənə varaq,

Yolu yarı yolda qoyaq.

Haqqa üz tutub yalvaraq,

Çıxaq döyüşdən qəhrəman,

Yol başlayıb gedən karvan.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

SARI GÖZƏL, SARI ÇİÇƏK

 

(Günəşə aşiq, bəxtəvər sevdalı,

İlahinin möcüzəsi günəbaxan çiçəyi önündə keçirdiyim bir neçə düşüncəmə)

 

Sarı donlu, sarı çiçək,

Səni gördüm, sarı telli.

Neçə gözəl, söz önünə,

Göz önünə düzüldülər.

 

Oğuz qızı sarı donlu,

Selcan xatun

Yada düşdü.

Ürəyim lap oda düşdü,

Dağdan aşdı sarı atda,

Sarı donlu gözəl getdi,

Ürəyim lap sənlə getdi.

Tilsimləndim gözəlliyə

Baxa-baxa.

Baxışlarım axa-axa

Göz önündən bir qənirsiz

Gözəl keçdi.

Bir dərə uzunu, bir yol uzunu

Pərişan gözündə bir qədər keçdi.

Bir dəli sevdalı

aşıq oxudu:

«Saçın ucun hörməzlər,

Gülü sulu dərməzlər,

Sarı gəlin...»

Bir dərdli aşiq oxudu.

Bu nə tale, bu nə qismət

Bu nə bəxt.

Səni mənə verməzlər...

Məni niyə bəyənməzlər

Götürüb aradan qaçmaq istədi

Yolları namərd bağlasa.

Günəşə üçmaq istədi.

Sarı çiçək.

Sarı sevda!

Yandım, Allah, mən bu odda

Sarı telli aşıq çiçək,

Sən günəşi sevdiyin tək

Biz bu yurdu sevəmmədik.

Bu torpağa məcnunluğu

Demirəm mən,

Ləçəyin tək sevəmmədik,

Sevəmmədik,

Paralandı oğuz elim,

Torpağım, daşım getdi.

Bağlandı qolum, tək dilim.

 

Qarabağım, Şuşam getdi.

Sən günəşi sevdiyin tək,

Biz sevməyi bacarmadıq.

Ləçəyin tək səf-səf

Durub dayanmağa tab

almadıq.

Sarı çiçək.

İllər keçir, öc almadıq,

Aman Allah,

İllər keçir, yaddaş itir,

Torpaq itir.

Yaddaşımı bitirməyə

Təpər yetir.

Torpağımı qaytarmağa

Ümid yetir,

İgid yetir,

Əsir-əsir, yesir-yesir

Gedənimi qaytarmağa

əsirgəmə, yollar yetir.

Aman Allah, içimizdə

Bu torpağı sevməyə

Bir çiçək təpəri,

Çiçək sevdası

bitir.

 

 

 

 

 

 

 

 

 

 

 

 

 

 

 

ÖZGƏ HAVALARA OYNAYAN GÖZƏL

 

(Barlarda, diskotekalarda, millətin dərdli çağında, vecsiz əhvalla oynayan qızlara)

 

Bu el düzümündən çəkilib dara,

Dərdin unudan xalq özü yaşamaz.

İçində böyüklük gəzdirənlərin

Sevinci qəmindən ucada durmaz.

Özgə havalara əriyən gözəl,

Yağmalanan elin dərdi kimindir?

Yanlışlıq ilmədə gözəldir, gözəl,

Bu səhvin ömürlük tale qəmindir.

 

Yox, yox, oynamağı ayıb bilmirəm,

Sükutlu toy evin yas yeri bildim,

Sən elə oynadın, üzündə sənin,

Bir bala dağına, yurd itkisinə

Havalanıb süzən bir ana gördüm.

 

Oynayan sən idin, yozan mən idim,

Dedim havalanıb, qəmdən oynayır.

Gedib Qarabağı, ölüb sevgisi,

Qəmindən süzülən dəmdən oynayır.

 

Nəvəsi deyilsən Burla Xatunun,

Qanında bir özgə qan yaşar sənin.

Bir oğuz gözəli, oğuz anası,

Dərdinə oynamaz bu məmləkətin.

 

Biganəlik xalqın Tanrı cəzası,

Bu gün pərən-parça torpaq kimiyik.

Gedəni dalınca tənha ulayan,

Yurdu yağmalardan ozan kimiyik.

 

İlahi, xalqımın dərdi ümmandı,

Damla günahları sən bizə yazma.

Torpaq itkisini, yurd itkisini,

Çadır həyatının tale yükünü,

Arsız oynamağın üzünə yozma.

 

 

 

 

 

 

BU SƏS MƏNİ ÖLDÜRƏCƏK

 

(Azərbaycan xalq artisti İlhamə xanıma)

 

Həsrət sındı çilik-silik,

Dəli sevda bir ömürlük.

Sözə, səsə sehirləndik.

Bu səs məni öldürəcək.

 

Bu səs tükənməyən ocaq,

Yanmayanı yandıracaq.

Ruhum bədəndən uçacaq,

Bu səs məni öldürəcək.

 

Unut dedin- səsdə üsyan,

Yandı hicran, dondu hicran.

Sevdim, seçdim Allahacan,

Bu səs məni öldürəcək.

 

Söz Tanrıdan gələn bir sirr

Deyilməyən sözün əsir.

Səs haqq yolu, son görünmür,

Bu səs məni öldürəcək.

 

Səsdən yol toxuyan, gedək,

Qəm evini yıxaq, gedək.

Sözdən çiçək göyərtməsək,

Bu səs məni öldürəcək.

 

Ayrılıq var, haqdan deyil,

Sınan tale bəxtdən deyil,

Mən ölməzdim, vaxtı deyil,

Bu səs məni öldürəcək.