Sona Vəliyevadan dörd yeni 4 kitab
Bu il 60 yaşı tamam olan tanınmış şair, Azərbaycan Yazıçılar Birliyinin üzvü, Əməkdar jurnalist, filologiya elmləri doktoru, Özbəkistanın Ürgənc Dövlət Universitetinin fəxri professoru, Azərbaycan Mətbuat Şurasının “Ali Media”, Mədəniyyət Nazirliyinin “Qızıl Kəlmə”, Qırğızıstan Milli Yazıçılar Birliyinin “Qızıl qələm” mükafatları laureatı, Ümumdünya Türk Xalqları Konqresinin Qızıl, TÜRKSOY-un “Molla Pənah Vaqif”, həmçinin Azərbaycan Prezidentinin sərəncamı ilə “Tərəqqi” medallarına layiq görülən Sona Vəliyevanın 4 yeni kitabı çap olunub.
Onlardan biri şairin 2018–2021-ci illərdə yazdığı dərin məzmunlu şeirləri, eyni zamanda əvvəlki kitablarından bəzi seçmə poetik nümunələrin toplandığı “Ömrün” yaddaşı kitabıdır. Poetik topluda Sona Vəliyevanın bədii, elmi və publisistik yaradıcılığı haqqında müxtəlif illərdə elm, sənət, mədəniyyət və ədəbiyyat adamları məqalələr yazmışlar. Həmin məqalələr dövri mətbuatda çap olunmuş və müəllifin yaradıcılığı haqqında yazılardan ibarət “Bitməyən söz”, “Sözün işığı” adlı kitablarında toplanmışdır. Nəşrdə həmin yazılardan çıxarılmış fikirlərə yer verilmişdir. Nəşrdə şairənin ən müxtəlif mövzularda yazdığı həssas ruhlu, düşündürücü şeirləri cəm olunub. Kitabdakı rəsm əsərləri məxsusi olaraq Sona Vəliyevanın şeirlərinin məzmununa uyğun olaraq çəkilib. Hər şeirin qarşısında həmin poetik nümunəyə aid rəsm əsəri yer alıb. Rəsm əsərlərinin müəllifi İmran Nurəlidir.
Digər kitab “Sözə dünyəvi nəzər” adlanır. Kitabda S.Vəliyevanın həyat və yaradıcılığı haqqında dünya yazarlarının, əcnəbi elm və ədəbiyyat adamlarının məqalələri, eləcə də xarici ölkələrdə çap olunan kitabları barədə azərbaycanlı yazarların məqalələri də yer alıb. Topluda Georgi Pryaxin (Rusiya), Tolqan Mameyev (Qırğızıstan), Duko M.Petroviç, Nina Smiç (Serbiya), Mişel Cassir (Fransa), Əhməd Urfalı, Müjgan Süvər, Songül Dündar (Türkiyə), Əhməd Sami Elaydi (Misir), Əkbər Həmdi Əlyar (İran), Anna Augustinyak (Polşa), Martin Prebudila (Slovakiya), Adhambel Alimbekov (Özbəkistan), Rıfat Salah (Rusiya, Tatarıstan) və başqa alim və yazarlar Sona Vəliyevanın yaradıcılığı haqqında məqalələri toplanıb. Eyni Zamanda Sona Vəliyevanin xarici ölkələrdə çıxan kitabları haqqında azərbaycanlı müəlliflərin - Səlim Babullaoğlu (Polşa), Kamran Nəzirli (İngiltərə), Qalina Mikaladze (Rusiya) – yazdığı məqalələrə də nəşrdə əks olunub..
Digər kitabda isə Sona Vәliyevanın hәyat vә yaradıcılığı, elәcә dә fәaliyyәti haqqında yazılmış yeddi mәktub toplanmışdır. “Sona Vəliyevaya ünvanlanmış yeddi açıq məktub” adlı kitabda Nəriman Həsənzadə, Sabir Rüstəmxanlı, Adhambek Alimbekov, Flora Xəlilzadə, Telli Pənahqızı, İbrahim Yusifoğlu və Qərənfil Dünyaminqızının açıq məktubları cəm olub.
Nəhayət dördüncü nəşr tanınmış gənc ədəbi tənqidçi Mahmud Əyyublunun “Sona Vəliyevanın poetik dünyası” adlı nəşrdir. Kitabda haqqında danışılan şairin poeziyasının yaradıcı özəllikləri, bədii təsvir və ifadə vasitələrinin orijinallığı, bədii düşüncə sistemi nəzəri cəhətdən təhlilə cəlb olunmuşdur.
rn